STORY: My First Tagalog Short Story 4

              Noong Martes, sinalubong ako ni Joanna noong umaga ng kwento.  Patakbo niya akong nilapitan pagpasok ko ng gate ng paaralan. Mayroon kasi siyang nabasa sa dyaryo kahapon na contest. Dahil hindi ako makausap ng matino kahapon gawa ng manong na lumapit sakin, ngayon lang nya ako sinabihan tungkol sa nabasa niya. Habang tulala kasi ako sa restawran kahapon, binabasa ni Joanna yung dyaryong naiwan nung manong sa lamesa na inupuan namin. Nakita niya na mayroong short story writing contest na bukas sa lahat ng estudyante na nag-aaral sa isang kolehiyo sa Metro Manila. Alam ni Joanna na gusto ko maging manunulat kaya bilang kaibigan, lagi niya akong sinsabihan ng mga contest na ganito. Sa ganitong paraan kami naging matalik na magkaibigan. Noong unang araw kasi ng pagpasok namin sa kolehiyo, nagpakilala kami sa harap ng klase. Tinanong ng propesor namin sa Literatura noon kung ano ang hilig namin gawin upang doon kami kukuha ng inspirasyon sa pagsulat. Ito ay para sa takda namin na tatlong taon na ang nakakalipas. Nabanggit ni Joanna noon na mahilig siya sa pagsayaw kaya nga ang una niyang pinasang gawa ay tungkol sa kanyang pagmamahal dito. Noong nalaman kong may audition para sa dance group ng kolehiyo, isinulat ko ang pangalan niya sa listahan bagamat hindi pa naman kami tuluyang magkakilala. Limited kasi ang slots kaya minabuti ko ng ireserba ang isang slot para sa kanya. Hindi kami magkakaklase sa lahat ng asignatura kaya muli kami nagkita sa klase namin sa Literatura. Nilapitan niya ako ng blanko ang mukha. Natakot ako kasi baka nagalit siya sa pagpirma ko ng pangalan nya ng walang pahintulot. Nagulat ako nang nilapitan nya ako at nagpasalamat sa akin. Natanggap siya sa dance group at hanggang ngayon, lagi ko siya sinasabihan kapag mayroong mga dance contests na pwede niya salihan.


Photo from Google
 Ganito rin si Joanna sa akin ang pinagkaiba lang, hindi ako sumasali. Pakiramdam ko kasi hindi ako mananalo, o kaya hindi ko matatapos sa oras. Bukod kasi sa mabagal ako magsulat, kailangan ko lagi ng inspirasyon na sa kasamaang palad ay hindi ko naman maiidikta kung kailan darating. Ang pangamba ko ay baka sa araw ng contest ay mablanko lamang ako at mapahiya. Ngunit sa pagkakataong ito, kinulit ako ng husto ni Joanna. Sabi niya sa akin, “Lagi mo sinasabing gusto mo maging manunulat. Pwes, kailangan mo magsulat.” Tama nga naman siya. Kailangan ko magsulat.

No comments: